తమిళనాడు ప్రభుత్వంలో కాంగ్రెస్.. 55 ఏళ్ల తర్వాత దక్కిన మంత్రి పదవులు

తమిళనాడు రాజకీయాల్లో దాదాపు ఐదున్నర దశాబ్దాల తర్వాత కాంగ్రెస్ పార్టీ మళ్లీ ప్రభుత్వంలో భాగం కాబోతోంది. నూతన ముఖ్యమంత్రి సి.జోసెఫ్ విజయ్ నేతృత్వంలోని తమిళగ వెట్రి కళగం (టీవీకే) ప్రభుత్వంలో కాంగ్రెస్‌కు రెండు మంత్రి పదవులు కేటాయించడంతో ఈ కీలక పరిణామం చోటుచేసుకుంది.

ఇటీవల జరిగిన తమిళనాడు అసెంబ్లీ ఎన్నికల్లో ఏ పార్టీకీ స్పష్టమైన మెజారిటీ లభించలేదు. 234 స్థానాలున్న అసెంబ్లీలో, తొలిసారి ఎన్నికల్లో పోటీ చేసిన విజయ్ పార్టీ టీవీకే 108 స్థానాలతో అతిపెద్ద పార్టీగా అవతరించింది. అయితే, ప్రభుత్వం ఏర్పాటుకు అవసరమైన 118 సీట్ల మేజిక్ ఫిగర్‌కు చేరుకోలేకపోయింది. దీంతో విజయ్.. కాంగ్రెస్, ఇతర భావసారూప్యత కలిగిన పార్టీల మద్దతు కోరారు.

కాంగ్రెస్ పార్టీ 5 స్థానాల్లో గెలుపొందగా, సీపీఐ, సీపీఎం, వీసీకే, ఐయూఎంఎల్ వంటి పార్టీలు కూడా టీవీకేకు మద్దతు ప్రకటించాయి. దీంతో విజయ్ సులభంగా మెజారిటీని సాధించి ప్రభుత్వం ఏర్పాటుకు ముందుకొచ్చారు. చెన్నైలోని జవహర్‌లాల్ నెహ్రూ ఇండోర్ స్టేడియంలో జరిగిన కార్యక్రమంలో గవర్నర్ రాజేంద్ర విశ్వనాథ్ అర్లేకర్.. విజయ్‌తో ముఖ్యమంత్రిగా, మరో 9 మందితో మంత్రులుగా ప్రమాణ స్వీకారం చేయించారు.

డీఎంకేతో పొత్తులో ఉన్నప్పటికీ, గతంలో ఎన్నో ఏళ్లుగా కాంగ్రెస్‌కు కేబినెట్‌లో స్థానం లభించలేదు. 2006లో 34 సీట్లు గెలిచినా మంత్రి పదవులు దక్కలేదు. తాజా పరిణామంతో కాంగ్రెస్ శ్రేణుల్లో కొత్త ఉత్సాహం నెలకొంది. అయితే, కాంగ్రెస్ తరఫున మంత్రులుగా ఎవరు ప్రమాణం చేస్తారనే దానిపై ఇంకా చర్చలు జరుగుతున్నాయని, త్వరలోనే ఢిల్లీ అధిష్ఠానం నిర్ణయం తీసుకుంటుందని ఏఐసీసీ పరిశీలకుడు గిరీశ్ చోడంకర్ తెలిపారు. మేలూరు ఎమ్మెల్యే పి.విశ్వనాథన్, కిళియూరు ఎమ్మెల్యే ఎస్.రాజేష్‌కుమార్ పేర్లు మంత్రి పదవుల రేసులో ముందున్నట్లు సమాచారం.